ពិធីទទួលស្វាគមន៍ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ

October 21, 2025 ព័ត៌មមាន, សេវាគំរូ ២០២៤

ថ្ងៃអង្គារ ១៤ រោច ខែអស្សុជ ឆ្នាំម្សាញ់ សប្តស័ក ព.ស ២៥៦៩ ត្រូវនឹងថ្ងៃទី២១ ខែតុលា ឆ្នាំ២០២៥ មន្ទីរពេទ្យបង្អែកកំពង់ចាមបានរៀបចំពិធីទទួលស្វាគមន៍ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការវាយតម្លៃអង្គភាពផ្តល់សេវាសាធារណៈថ្នាក់ជាតិ ( គ.វ.ជ ) ក្នុងគោលបំណងដើម្បីជួបសំណេះសំណាល និងឈ្វេងយល់ ពីបទពិសោធន៍ជាក់ស្តែងនិយមស្តីពី ឧត្តមានុវត្តន៍ និងនវានុវត្តន៍នៃការគ្រប់គ្រង និងការផ្តល់សេវា របស់មន្ទីរពេទ្យបង្អែកខេត្តកំពង់ចាម ដែលជាមន្ទីរពេទ្យជ័យលាភីលេខ១ទូទាំងប្រទេសកម្រិត CPA3 ជាអង្គភាពផ្តល់សេវាសាធារណៈគំរូក្នុងវិស័យសុខាភិបាល ឆ្នាំ២០២៤ ។

អមដំណើរ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ នៅក្នុងឱកាសនៃពិធីសំណេះសំណាល និងឈ្វេងយល់ ពីបទពិសោធន៍ជាក់ស្តែងនិយមស្តីពី ឧត្តមានុវត្តន៍ និងនវានុវត្តន៍នៃការគ្រប់គ្រង និងការផ្តល់សេវា របស់មន្ទីរពេទ្យបង្អែកខេត្តកំពង់ចាមនាពេលនោះរួមមាន ឯកឧត្តម លោកជំទាវ គណៈកម្មការវាយតម្លៃអង្គភាពផ្តល់សេវាសាធារណៈថ្នាក់ជាតិ ( គ.វ.ជ ) ឯកឧត្តមអភិបាលនៃគណៈអភិបាលខេត្តកំពង់ចាម ឯកឧត្តមអភិបាលរងនៃគណៈអភិបាលខេត្តកំពង់ចាម លោកនាយករដ្ឋបាលខេត្តកំពង់ចាម លោក លោកស្រី ប្រធានមន្ទីរអង្គភាពជុំវិញខេត្តកំពង់ចាម ព្រមទាំងមានការចូលរួមពីសំណាក់លោក លោកស្រី ថ្នាក់ដឹកនាំមន្ទីរពេទ្យ ប្រធានផ្នែក នាយសាល និងមន្ត្រីនៃមន្ទីរពេទ្យបង្អែកខេត្តកំពង់ចាមផងដែរ ។

ថ្លែងក្នុងឱកាសនោះ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងប្រធានគណៈកម្មការវាយតម្លៃអង្គភាពផ្តល់សេវាសាធារណៈថ្នាក់ជាតិ បានធ្វើការវាយតម្លៃខ្ពស់ចំពោះការខិតខំប្រឹងប្រែងរបស់ថ្នាក់ដឹកនាំ និងមន្ត្រីរាជការនៃមន្ទីរពេទ្យបង្អែកខេត្តកំពង់ចាមគ្រប់លំដាប់ថ្នាក់រហូតទទួលបានជ័យលាភីជាអង្គភាពផ្តល់សេវាសាធារណៈគំរូឆ្នាំ២០១៩ និងឆ្នាំ២០២៤ ។

ឯកឧត្តម ឧបនាយករដ្ឋមន្ត្រី បានបន្ថែមថាសមិទ្ធិផល ដែលទទួលបាននៅពេលនេះមិនមែនជាការចៃដន្យនោះទេ គឺកើតឡើងដោយសារការខិតខំប្រឹងប្រែង រួមទាំងភាពវៃឆ្លាត ក្នុងការដឹកនាំ ចាត់ចែងរបស់ថ្នាក់ដឹកនាំមន្ទីរពេទ្យ ប្រកកបដោយភាពប្រាដកនិយម ចក្ខុវិស័យវែងឆ្ងាយ មានសាមគ្គីភាពផ្ទៃក្នុងល្អ ព្រមទាំងមានការចូលរួមពីអាជ្ញាធរដែនដី គ្រប់លំដាប់ថ្នាក់ សហគមន៍ និងអង្គការដៃគូអភិវឌ្ឍនានា ដែលបង្ហាញឲ្យឃើញពីភាពប្រទាក់ក្រឡាគ្នា នៃការទំនាក់ទំនងប្រកបដោយប្រសិទ្ធភាព ដើម្បីកៀរគរធនធនសម្រាប់អភិវឌ្ឍនមន្ទីរពេទ្យឲ្យកាន់តែមានភាពរីកចម្រើន ។

ឯកឧត្តម ឧបនាយករដ្ឋមន្ត្រី ក៏បានលើកទឹកចិត្តឱ្យអង្គភាពផ្តល់សេវាសាធារណៈទាំងអស់ ត្រូវតែ បន្តកិច្ចខិតខំប្រឹងប្រែង កែលម្អ ពង្រឹង និងលើកកម្ពស់គុណភាព ប្រសិទ្ធភាព គណនេយ្យភាព នៃការគ្រប់គ្រង ដើម្បីបំពេញសេវាជូនប្រជាជន ក្នុងមូលដ្ឋានរបស់ខ្លួនឱ្យកាន់តែល្អប្រសើរ ។

ឯកឧត្តមឧបនាយករដ្ឋមន្ត្រី ក៏បានលើកទឹកចិត្តអង្គភាពផ្តល់សេវាសាធារណៈទាំងអស់ បន្តកិច្ចខិតខំប្រឹងប្រែង និងប្រើប្រាស់ធនធានប្រកបដោយនវានុវត្តន៍ និងអស់សក្តានុពល ក្នុងស្មារតីរួមសាមគ្គីគ្នា និងសហការគ្នា ឱ្យកាន់តែជិតស្និទ្ធរវាងថ្នាក់ដឹកនាំអង្គភាពជាមួយមន្ត្រី អាជ្ញាធរមូលដ្ឋាន សហគមន៍ ស្ថាប័នដៃគូអភិវឌ្ឍន៍ និងតួអង្គពាក់ព័ន្ធទាំងអស់ ដើម្បីកែលម្អ ពង្រឹង និងលើកកម្ពស់គុណភាព ប្រសិទ្ធភាព គណនេយ្យភាព នៃការគ្រប់គ្រង និងការផ្លាស់ប្តូរនៃការផ្តល់សេវាសាធារណៈ ដើម្បីបំពេញសេវាជូនប្រជាជន ក្នុងមូលដ្ឋានរបស់ខ្លួនឱ្យកាន់តែល្អប្រសើរ ព្រមទាំងលើកទឹកចិត្តឱ្យមានការផ្សព្វផ្សាយឱ្យបានទូលំទូលាយនូវសកម្មភាពនានា នៃការអនុវត្តការងាររបស់មន្ត្រីរាជការគ្រប់ជាន់ថ្នាក់ទាំងអស់ ក្នុងគោលដៅ បង្កើនការផ្សព្វផ្សាយឧត្តមានុវត្តន៍ និងនវានុវត្តន៍ នៃការផ្តល់សេវារបស់អង្គភាពជ័យលាភី និងគុណតម្លៃនៃមន្ត្រីសុខាភិបាលមូលដ្ឋាន៕

 

អានបន្ត

ពិធីអបអរសាទរ និងដង្ហែពានជ័យលាភី មន្ទីរពេទ្យបង្អែកខេត្តកំពង់ចាម អង្គភាពសុខាភិបាលផ្តល់សេវាសំណុំសកម្មភាពបង្រ្គប់កម្រិត៣ (CPA៣) ទទួលបានជ័យលាភីចំណាត់ថ្នាក់លេខ១ ទូទាំងប្រទេស ប្រចាំឆ្នាំ២០២៤

March 22, 2025 សេវាគំរូ ២០២៤

 

នាព្រឹកថ្ងៃថ្ងៃសៅរ៍ ៩ រោច ខែផល្គុន ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២២ ខែមីនា ឆ្នាំ២០២៥ រដ្ឋបាលខេត្តកំពង់ចាម សហការជាមួយ មន្ទីរសុខាភិបាលនៃរដ្ឋបាលខេត្តកំពង់ចាម មន្ទីរពេទ្យបង្អែកខេត្តកំពង់ចាម ព្រមទាំងមន្ទីរ អង្គភាពពាក់ព័ន្ធ បានរៀបចំពិធីអបអរសាទរ និងដង្ហែពានជ័យលាភី របស់មន្ទីរពេទ្យបង្អែកខេត្តកំពង់ចាម ក្រោមអធិបតីភាពដ៏ខ្ពង់ខ្ពស់ ឯកឧត្ដម ខ្លូត ផន ប្រធានក្រុមប្រឹក្សាខេត្តកំពង់ចាម និងឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម ។

ពិធីនេះក៏មានការអញ្ជើញចូលរួមពី ថ្នាក់ដឹកនាំ និងមន្ត្រីរាជការ នៃរដ្ឋបាលខេត្ត រដ្ឋបាលក្រុង/ស្រុក មន្ទីរ អង្គភាពជុំវិញខេត្ត មន្ទីរសុខាភិបាលនៃរដ្ឋបាលខេត្ត មន្ទីរពេទ្យបង្អែក និងមន្ត្រីរាជការនៃមន្ទីរពេទ្យបង្អែកខេត្តកំពង់ចាម យ៉ាងច្រើនកុះករ ប្រកបដោយបរិយាកាសរំភើប និងសប្បាយរីករាយ ។

ពិធីអបអរសាទរនិងដង្ហែរពានជ័យលាភីអង្គភាពផ្ដល់សេវាសាធារណៈគំរូ នៅពេលនេះត្រូវបានរៀបចំឡើង ក្នុងគោលបំណងដើម្បីលើកទឹកចិត្តដល់កិច្ចខិតខំប្រឹងប្រែងក្នុងអភិវឌ្ឍន៍មន្ទីរពេទ្យ និងការផ្តល់សេវាសាធារណៈ ជូនប្រជាពលរដ្ឋរបស់អង្គភាពជ័យលាភីទាំង៤ ប្រចាំឆ្នាំ២០២៤ របស់មន្ទីរសុខាភិបាលនៃរដ្ឋបាលខេត្តកំពង់ចាម ក៏ដូចជាផ្សព្វផ្សាយឱ្យកាន់តែទូលំទូលាយអំពីការប្រកួតប្រជែងអង្គភាពផ្តល់សេវាសាធារណៈគំរូក្នុងវិស័យអប់រំ និងវិស័យសុខាភិបាល សម្រាប់ឆ្នាំបន្តបន្ទាប់ទៀត ។

នេះ គឺជាទិវាប្រកបដោយអត្ថន័យជ្រាលជ្រៅ និងមានកិត្តិយសដ៏ថ្លៃថ្លា ដែលរដ្ឋបាលខេត្តកំពង់ចាម ថ្នាក់ដឹកនាំខេត្ត ថ្នាក់ដឹកនាំមន្ទីរសុខាភិបាលនៃរដ្ឋបាលខេត្តកំពង់ចាម មន្ទីរអង្គភាពជុំវិញខេត្ត និងមន្ត្រីរាជការ ប្រជាពលរដ្ឋក្នុងខេត្តកំពង់ចាម មានអំណរសាទរក្រៃលែង ដែលបានរៀបចំពិធីអបអរសាទរនិងដង្ហែរពានជ័យលាភីអង្គភាពផ្ដល់សេវាសាធារណៈគំរូក្នុងវិស័យអប់រំ និងវិស័យសុខាភិបាលឆ្នាំ២០២៤ ។

បន្ទាប់ពីបានទទួលការវាយតម្លៃ ដែលបានអនុវត្តប្រកបដោយសុក្រឹតភាព ចរិតភាព និងការទទួលខុសត្រូវ និងមនសិការវិជ្ជាជីវៈខ្ពស់ របស់គណៈកម្មការវាយតម្លៃអង្គភាពផ្ដល់ សេវាសាធារណៈថ្នាក់ជាតិ (គ.វ.ជ.) ជាច្រើនដំណាក់កាលរួចមក រាជរដ្ឋាភិបាលនៃ ព្រះរាជាណាចក្រកម្ពុជាបានចេញអនុក្រិត្យ លេខ២៣ អនក្រ.បក ចុះថ្ងៃទី២៧ ខែកុម្ភៈ ឆ្នាំ២០២៥ ស្តីពីការទទួលស្គាល់ជ័យលាភីអង្គភាពផ្តល់សេវាសាធារណៈគំរូ ក្នុងវិស័យអប់រំ និងវិស័យសុខាភិបាល ឆ្នាំ២០២៤ ដែលចុះហត្ថលេខាដោយ សម្តេចមហាបវធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានសម្រេចទទួលស្គាល់អង្គភាពផ្តល់សេវាសាធារណៈគំរូក្នុងវិស័យអប់រំ និងវិស័យសុខាភិបាលប្រចាំឆ្នាំ២០២៤ សម្រាប់ខេត្តកំពង់ចាមមាន៖ ១.) មន្ទីរពេទ្យបង្អែកខេត្តកំពង់ចាម ជាប់ចំណាត់ថ្នាក់លេខ១ ទូទាំងប្រទេស ក្នុងចំណោមមន្ទីរពេទ្យផ្តល់សំណុំសកម្មភាពបង្រ្គប់កំរិត ៣ ( CPA3 )ជាអង្គភាពផ្តល់សេវាសាធារណៈគំរូ ក្នុងវិស័យសុខាភិបាលប្រចាំឆ្នាំ២០២៤ ២). មន្ទីរពេទ្យបង្អែកបាធាយជាប់ចំណាត់ថ្នាក់លេខ៤ ទូទាំងប្រទេស ក្នុងចំណោមមន្ទីរពេទ្យផ្តល់សំណុំសកម្មភាពបង្រ្គប់កំរិត ២ ( CPA2 ) ៣).មន្ទីរពេទ្យបង្អែកចំការលើ ជាប់ចំណាត់ថ្នាក់លេខ៨ ទូទាំងប្រទេស ក្នុងចំណោមមន្ទីរពេទ្យផ្តល់សំណុំសកម្មភាពបង្រ្គប់កំរិត ២ ( CPA2 ) ៤.) មន្ទីរពេទ្យបង្អែកព្រៃឈរ ជាប់ចំណាត់ថ្នាក់លេខ៩ ទាំងប្រទេស ក្នុងចំណោមមន្ទីរពេទ្យផ្តល់សំណុំសកម្មភាពបង្រ្គប់កំរិត ១ ( CPA1 ) ។

សូមបញ្ជាក់ផងដែរថា កាលពីឆ្នាំ២០១៩ រដ្ឋបាលខេត្ដកំពង់ចាម និងមន្ទីរសុខាភិបាលនៃរដ្ឋបាលខេត្តកំពង់ចាម ក៏បានរៀបចំពិធីអបអរសាទរនិងដង្ហែរពានជ័យលាភីអង្គភាពផ្ដល់សេវាសាធារណៈគំរូក្នុងវិស័យអប់រំនិងវិស័យសុខាភិបាលឆ្នាំ២០១៩ ដែលជ័យលាភីនៅពេលនោះមាន៖ ១). មន្ទីរពេទ្យខេត្តកំពង់ចាម ជាប់ចំណាត់ថ្នាក់លេខ១ ទូទាំងប្រទេស ក្នុងចំណោម មន្ទីរពេទ្យផ្តល់សំណុំសកម្មភាពបង្រ្គប់កំរិត ៣( CPA3 ) ជាអង្គភាពផ្តល់សេវាសាធារណៈគំរូ ក្នុងវិស័យសុខាភិបាលប្រចាំឆ្នាំ២០១៩ ២). មន្ទីរពេទ្យបង្អែកបាធាយជាប់ចំណាត់ថ្នាក់លេខ២ ទូទាំងប្រទេស ក្នុងចំណោមមន្ទីរពេទ្យផ្តល់សំណុំសកម្មភាពបង្រ្គប់កំរិត ២ ( CPA2 )
៣). មន្ទីរពេទ្យបង្អែកចំការលើ ជាប់ចំណាត់ថ្នាក់លេខ៨ ទូទាំងប្រទេស ក្នុងចំណោម មន្ទីរពេទ្យផ្តល់សំណុំសកម្មភាពបង្រ្គប់កំរិត ២ ( CPA2 ) ៤). មន្ទីរពេទ្យបង្អែកព្រៃឈរ ជាប់ចំណាត់ថ្នាក់លេខ៣ ទាំងប្រទេស ក្នុងចំណោម មន្ទីរពេទ្យផ្តល់សំណុំសកម្មភាពបង្រ្គប់កំរិត ១ ( CPA1 ) ។

ថ្លែងក្នុងឱកាសនោះ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានមានប្រសាសន៍ថា មន្ទីរពេទ្យបង្អែកខេត្តកំពង់ចាម បានទទួលជោគជ័យ ក្នុងការក្លាយជាអង្គភាពផ្តល់សេវាសាធារណៈគំរូនេះ គឺដោយសារមានការយកចិត្តទុកដាក់ និងគាំទ្រយ៉ាងពេញទំហឹង ពីអាជ្ញាធរពាក់ព័ន្ធ ព្រមទាំងសហគមន៍ ផងដែរ ។

ជាមួយគ្នានោះដែរ ឯកឧត្តមអភិបាលខេត្ត ក៏បានផ្ដាំផ្ញើដល់មន្ត្រីសុខាភិបាលខេត្តកំពង់ចាមទាំងអស់ សូមឱ្យបន្តក្នុងការរក្សា នូវចំណុចល្អៗដែលយើងបានធ្វើ រហូតទទួលជ័យលាភីលេខ១ ពីការប្រឡងប្រណាំងអង្គភាពផ្តល់សេវាសាធារណៈគំរូ ក្នុងវិស័យសុខាភិបាលឆ្នាំ ២០២៤ នេះ ពោលគឺ គ្រប់គ្រងខ្សែក្រវ៉ាត់នេះឲ្យបាន ដោយផ្អែកទៅលើការផ្តល់សេវា របស់ខ្លួនឱ្យកាន់តែល្អប្រសើរមួយកម្រិតទៀត នាពេលបច្ចុប្បន្ន និងទៅអនាគត ។

ក្នុងរយៈពេល ៥ឆ្នាំ (២០២០-២០២៤) មន្ទីរពេទ្យបង្អែកខេត្តកំពង់ចាម បានអភិវឌ្ឍន៍អង្គភាពរបស់ខ្លួន ទាំងហេដ្ឋារចនាសម្ព័ន្ធ និង គុណភាព នៃការផ្តល់សេវា ។ មន្ទីរពេទ្យបង្អែកខេត្តនេះ ក៏បានដើរតួនាទីយ៉ាងសំខាន់ក្នុងការចូលរួម អនុវត្តការកែលម្អនូវរបៀបរបបនៃ ការគ្រប់គ្រង និង ភាពជាអ្នកដឹកនាំ ដើម្បីផ្តល់សេវា សុខាភិបាល ជូនប្រជាពលរដ្ឋ ឱ្យកាន់តែមានគុណភាពល្អប្រសើរឡើង ស្របតាមគោលនយោបាយនៃការកែទម្រង់របស់រាជរដ្ឋាភិបាលឆ្ពោះទៅការគ្របដណ្តប់ សុខភាពជាសកល ឆ្នាំ២០៣៥ ៕

អានបន្ត